Manoramaonline.com no longer supports Internet Explorer 8 or earlier. Please upgrade your browser.  Learn more »

ലുലുവിലെ മോഷണ ശ്രമം: ജീവൻ പണയംവച്ച് ചെറുത്തവർക്ക് പാരിതോഷികം, സ്ഥാനക്കയറ്റം

MUKHTAR-SEMEN കണ്ണൂർ സ്വദേശി മുക്താർ സെമനെ ലുലു ഗ്രൂപ്പ് ചെയർമാനും എംഡിയുമായ എം.എ.യൂസഫലി ആഭിനന്ദിക്കുന്നു.

ഷാർജ ∙ ഷാർജ അൽ ഫലാ ലുലു ഹൈപ്പർമാർക്കറ്റിൽ കൊള്ളയടിക്കാനുള്ള ശ്രമം സ്വയംരക്ഷപോലും മറന്ന് ധീരമായ ചെറുത്തു തോൽപിച്ച രണ്ടു ജീവനക്കാർക്ക് പാരിതോഷികവും ജോലിയിൽ സ്ഥാനക്കയറ്റവും. കാഷ്യറായിരുന്ന കണ്ണൂർ സ്വദേശി മുക്താർ സെമൻ, ഹൈദരാബാദ് സ്വദേശി അസ്‌ലം പാഷാ മുഹമ്മദ് എന്നിവർക്കാണ് അബുദാബിയിലെ ലുലു ആസ്ഥാനത്ത് നടന്ന പ്രത്യേക ചടങ്ങിൽ ലുലു ഗ്രൂപ്പ് ചെയർമാനും എംഡിയുമായ എം.എ.യൂസഫലി 5,000 ദിർഹം, മൊമന്റോ, കീർത്തിപത്രം എന്നിവ സമ്മാനിച്ചത്. എത്രയും പെട്ടെന്ന് ഇരുവരെയും ഉയർന്ന തസ്തികയിൽ നിയമിക്കാനും നിർദേശിച്ചു.

ധീരപ്രവൃത്തി കാണിച്ച ഇരുവരെയും താൻ അഭിനന്ദിക്കുന്നതായും അതേസമയം, എല്ലാ ജീവനക്കാരും ഇത്തരം സാഹചര്യങ്ങളുണ്ടാകുമ്പോൾ ജാഗരൂകരായിരിക്കണമെന്നും യൂസഫലി പറഞ്ഞു. യുഎഇ പൊലീസും സുരക്ഷാ സംവിധാനവും ലോകത്തെ തന്നെ ഏറ്റവും മികച്ചതാണ്. പ്രതികളെ വളരെ പെട്ടെന്ന് തന്നെ പിടികൂടിയ ഷാർജ പൊലീസിനെയും അദ്ദേഹം അഭിനന്ദിച്ചു.

ASLAM-PASHA ഹൈദരാബാദ് സ്വദേശി അസ്‌ലം പാഷാ മുഹമ്മദിനെ ലുലു ഗ്രൂപ്പ് ചെയർമാനും എംഡിയുമായ എം.എ.യൂസഫലി അഭിനന്ദിക്കുന്നു.

കഴിഞ്ഞ വെള്ളിയാഴ്ച രാത്രി ഹൈപ്പർമാർക്കറ്റ് പ്രവർത്തിച്ചുകൊണ്ടിരുന്നപ്പോഴായിരുന്നു സംഭവം. മുഖം മൂടി ധരിച്ചെത്തിയ ആജാനുബാഹുക്കളായ രണ്ടുപേർ ക്യാഷ് കൗണ്ടറിലെ ജീവനക്കാരനെ ആക്രമിച്ച് പണം കൊള്ളയടിക്കാനായിരുന്നു ശ്രമിച്ചത്. ആദ്യം ഒരാളാണ് സ്ഥലത്തെത്തിയത്. ഇയാൾ ആയുധമുപയോഗിച്ച് കൗണ്ടർ തകർക്കാൻ ശ്രമിക്കുന്നത് ജീവനക്കാരൻ തടഞ്ഞു. 

lulu-sharjah-attack ഷാർജ അൽ ഫലാ ലുലു ഹൈപ്പർമാർക്കറ്റിൽ കൊള്ളയടിക്കാനുള്ള ശ്രമം ജീവനക്കാർ തടയുന്നു.

ഇതോടെ രണ്ടാമത്തെ അക്രമിയും ആയുധവുമായി പ്രവേശിച്ചു. ഇയാളെയും മറ്റു ജീവനക്കാർ കൂടി ചേർന്ന് ചെറുത്തു. മിനിറ്റുകളോളം അക്രമികളും ജീവനക്കാരും ഏറ്റുമുട്ടി. അക്രമികളെ നേരിടുന്നതിനിടെ ഒരു ജീവനക്കാരന് സാരമായ പരുക്കേറ്റു. ഉദ്യമം പരാജയപ്പെട്ടതിനെ തുടർന്ന് അക്രമികൾ രക്ഷപ്പെടാനുള്ള ശ്രമം നടത്തിയെങ്കിലും ഹൈപ്പർമാർക്കറ്റിൽ നിന്ന് പുറത്തു കടക്കും മുൻപേ സ്ഥലത്തെത്തിയ പൊലീസ് പ്രതികളെ അറസ്റ്റ് ചെയ്തു. യാതൊന്നും കവർച്ച ചെയ്യാൻ സാധിച്ചിരുന്നില്ല.

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.