Manoramaonline.com no longer supports Internet Explorer 8 or earlier. Please upgrade your browser.  Learn more »

സി.കെ. മുഹമ്മദ് വിവർത്തന പുരസ്കാരം റഹ്മാൻ മുന്നൂരിന്

ദോഹ ∙ അറബിക്കിൽ നിന്നു മലയാളത്തിലേക്ക് വിവർത്തനം ചെയ്ത കൃതികളിൽ ഏറ്റവും നല്ല വിവർത്തകനു ദോഹ ഫ്രന്റ്സ് ഏർപ്പെടുത്തിയ സി.കെ. മുഹമ്മദ് പുരസ്കാരം(25,001 രൂപ) റഹ്മാൻ മുന്നൂരിന്(പി.ടി. അബ്ദുറഹ്മാൻ). പ്രമുഖ പണ്ഡിതനായ സയ്യിദ് അബുൽ ഹസൻ അലി നദ്‌വിയുടെ ‘മാദാ ഖസിറൽ ആലം ബി ഇൻഹിത്വാതിൽ മുസ്‌ലിം’ എന്ന ഗ്രന്ഥത്തിന്റെ മലയാള വിവർത്തനത്തിനാണ് (‘മുസ്‌ലിംകളുടെ പതനവും ലോകത്തിന്റെ നഷ്ടവും’) പുരസ്കാരം. അറബിക്, ഉർദു, ഇംഗ്ലിഷ് ഭാഷകളിൽ നിന്ന് ഒട്ടേറെ പുസ്തകങ്ങൾ മലയാളത്തിലേക്ക് റഹ്മാൻ മുന്നൂര് വിവർത്തനം ചെയ്തിട്ടുണ്ട്്.

ചേന്ദമംഗല്ലൂരിനടുത്ത് മുന്നൂര് സ്വദേശിയാണ്. 2015-2017 കാലയളവിൽ മലയാളത്തിൽ പ്രസിദ്ധീകരിച്ച അറബിക്കിൽ നിന്നുള്ള വിവർത്തന കൃതിയാണ് അവാർഡിനായി പരിഗണിച്ചത്. സിനാൻ അന്തൂൺ രചിച്ച ‘വഹ്ദഹാ ശചറതു റുമ്മാൻ’ എന്ന പുസ്തകത്തിന്റെ മലയാളം വിവർത്തനമായ ‘വെള്ളപുതപ്പിക്കുന്നവർ’ എന്ന കൃതിയുടെ വിവർത്തകൻ ഡോ. എൻ. ഷംനാദിനു ജൂറിയുടെ പ്രത്യേകം പരാമർശം ലഭിച്ചു.

10,000 രൂപയും പ്രശസ്തിപത്രവും സമ്മാനമായി നൽകും. സി.കെ. മുഹമ്മദിന്റെ ജൻമ നാടായ മലപ്പുറം കരുവാരക്കുണ്ടിൽ ജൂലൈ അവസാന വാരം നടക്കുന്ന നടക്കുന്ന ചടങ്ങിൽ അവാർഡുകൾ വിതരണം ചെയ്യുമെന്ന് ദോഹ ഫ്രന്റ്സ് ഭാരവാഹികളായ ഉമർ കോയ, റഹീം ഓമശ്ശേരി, എസ്.കെ. തങ്ങൾ, കെ.ടി. ഹാഷിം, സൈഫുദ്ദീൻ എന്നിവർ അറിയിച്ചു. അറബിക് ഭാഷയിൽ നൈപുണ്യം നേടിയ ശേഷം ഖത്തറിലെ വിവിധ സ്ഥാപനങ്ങളിൽ ജോലി ചെയ്യുന്ന ഭാഷാ സ്നേഹികളുടെ കൂട്ടായ്മയാണു ദോഹ ഫ്രന്റ്സ്. കഴിഞ്ഞ പത്തു വർഷമായി അറബിക് ഭാഷയുടെ പ്രചാരണത്തിനും പരിപോഷണത്തിനുമായി കോളജ് തല മൽസരങ്ങളുൾപ്പെടെ കേരളത്തിൽ വിവിധ പരിപാടികൾ ദോഹ ഫ്രന്റ്സ് സംഘടിപ്പിക്കുന്നുണ്ട്. കൂട്ടായ്മയുടെ സ്ഥാപകരിൽ ഒരാളും വിവർത്തന കലയിൽ പ്രത്യേക പ്രാവീണ്യമുള്ളയാളുമായിരുന്ന സി.കെ. മുഹമ്മദ് രണ്ടു വർഷം മുൻപാണു നിര്യാതനായത്.

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.